Brønnfartøy og avlusing av fisk i lastebrønn – tilsyn ved ombygging F��lgjebrev til rundskriv RSV 06-2010

I samband med Fiskeri- og kystdepartementet si forskrift av 18. august 2009 nr 1095 om bekjempelse av lus i akvakulturanlegg, forkorta luseforskrifta, og kravet om avlusing i lukka behaldar i § 7, blir brønnfartøy ombygde til å kunne avluse fisk ved tilsetjing av kjemikaliar i lastebrønn.

Dette rundskrivet informerer om omfanget av det tilsynet som skal utførast i samband med ei slik ombygging, jf forskrift av 15. september 1992 nr 695 om bygging av passasjer-, lasteskip og lektere, § 9, samt forskrift av 15. juni 1987 nr 506 om besiktelse for utstedelse av sertifikater til passasjer-, lasteskip og lektere, og om andre besiktelser mm, §§ 22 og 24.

Vidare, for å verne arbeidstakarar mot eksponering av kjemikaliar, stiller forskrift av 1. januar 2005 nr 8 om arbeidsmiljø, sikkerhet og helse for arbeidstakere på skip, forkorta ASH-forskrifta, § 11-3(5) krav om at vernetiltak av teknisk art eller tiltak, metodar eller prosedyrar skal om mogleg gjennomførast framføre individuelle vernetiltak. Som del av vurderingane her bør ein sjå hen til IBC-koden sine krav til den aktuelle kjemikalien.

Som eit utgangspunkt skal følgjande dokumentasjon sendast inn til Sjøfartsdirektoratet for gjennomgang og eventuell oppfølging via den stasjonen som skal utføre inspeksjon:

1. Begjæring om inspeksjon.
2. Revidert generalarrangement som viser plassering av tank.
3. Systemteikningar av røyropplegg frå tank til dyser i lastebrønn.
   1. Dokumentasjonen skal vise røyr, skottgjennomføringar, flensar, ventilar og anna armatur frå tanken til dysene.
   2. Materialkvaliteten på dei ulike komponentane skal gå klart fram av stykklista på teikninga.
4. Stabilitetsdokumentasjon:
   1. Vektoverslag for ombygginga. Basert på resultatet her kan det bli ytterlegare krav om ny krengeprøve.
   2. Uansett skal lastekondisjonar med korrigert lettskip sendast inn for gjennomgang.
5. Rapport 94 som følgje av endring i tonnasje.
6. Risikoanalysar som følgje av at kjemikalen som blir nytta i avlusingsbadet kan inneha farlege eigenskapar, jf ASH-forskrifta, § 11-4.
7. Datablad for kjemikalien.
8. Teikning av og dokumentasjon på eigenskapane til tankkonteinar der slik blir brukt.
9. Fundamentsteikningar for tankkonteinar der slik blir brukt.

Slik Sjøfartsdirektoratet forstår det, er luseforskrifta under revidering med omsyn til krav om at behandla lus ikkje skal sleppast tilbake til sjø. Dersom denne endringa blir gjennomført, og fartøya i denne samanheng blir ytterlegare ombygde som fylgje av det, skal også slik ombygging meldast til Sjøfartsdirektoratet.