Flyttbare innretningar

Flyttbar innretning

Ei flyttbar innretning er ei flytande flyttbar offshoreeining, uansett skrogtype, som vert nytta til aktivitetar innan undersjøisk petroleumsverksemd, til dømes boreinnretningar, bustadinnretningar, innretningar for lagring og avskiping (FSO), innretningar for produksjon, lagring og avskiping (FPSO), innretningar for boring, produksjon, lagring og avskiping (FDPSO), og brønnintervensjonsinnretningar.

Underavdeling flyttbare innretningar sertifiserer flyttbare innretningar registrert i norsk skipsregister.

Tilsyn og maritime sertifikat/LOC

Maritime sertifikat

Sjøfartsdirektoratet utferdar maritime sertifikat på grunnlag av

• Dokumentkontroll
• Verifikasjonar om bord
• Reiarlaget sitt tryggleikstyringssystem

Vedlegg til sertifikata

Sjøfartsdirektoratet utferdar følgjande vedlegg til sertifikata:

• Annex I: Operasjonsavgrensingar
• Annex II: Aksepterte fråvik/unntak
• Påleggsliste: Liste over pålegg og midlertidige unntak med tidsfrist

Fornying av sertifikat

Ved fornying av sertifikat skal dei nyaste forskriftsversjonane leggast til grunn. Reiarlaget må då utarbeide og sende inn GAP-analyser til Sjøfartsdirektoratet. I tillegg skal reiarlaget vurdere tidlegare aksepterte fråvik/unntak (Annex II) med tanke på eventuell korrigering, eller bortfall på grunn av nye reglar. Konklusjonar sendast til Sjøfartsdirektoratet.

Fråvik/unntak

Fråviks-/unntakssøknadar skal minimum innehalde:

• Forskrift og paragraf det skal søkast fråvik/unntak frå.
• Skildring av avvik.
• Grunnar for kvifor fråvik/unntak bør aksepterast (kompenserande tiltak / likeverdig løysing / risikovurdering).
• Stadfesting om det er mellombels eller permanent. Søknad om mellombels fråvik/unntak skal påførast dato for lukking.

Dersom unntaket kan ha noko å seie for tryggleiken og arbeidsmiljøet, skal ein utsegn frå arbeidstakarane sin tillitsvalte, fortrinnsvis koordinerande hovudverneombod, leggast ved søknaden.

Andre tilsynsetatar

Sjøfartsdirektoratet har samarbeids-/bistandsavtalar med følgjande etatar for delegering av tilsynsoppgåver på flyttbare innretningar:

• Direktoratet for samfunnssikkerhet og beredskap. Avtalen gjeld tilsyn med elektrisk anlegg og elektrisk utstyr.
• Folkehelseinstituttet. Avtalen gjeld tilsyn med anlegg for drikkevatn.
• Fylkesmannen i Rogaland. Avtalen gjeld tilsyn med hygieniske forhold.
• Luftfartstilsynet. Avtalen gjeld tilsyn med helikopterdekk.
• Telenor Maritim Radio. Avtalen gjeld tilsyn med radioanlegg og radioutstyr.

Sjøfartsdirektoratet koordinerer tilsyn som skal utførast av desse etatane.

Klasseselskap

Nærings- og handelsdepartementet (NHD) har avtalar med følgjande klasseselskap for delegering av tilsynsoppgåver for flyttbare innretningar:

• American Bureau of Shipping (ABS)
• Det Norske Veritas (DNV)
• Lloyds Register of Shipping (LRS)

Avtalane gjeld i hovudsak tilsyn med skrog og maskineri, samt IAPP-, EIAPP- og ISPP-sertifikat.

I tillegg er ISSC delegert gjennom avtale som gjeld alle fartøytypar.

General authorisation from the NMA to Classification Society for MOUs (Annex VI)

Letter of Compliance (LOC)

Sjøfartsdirektoratet kan etter søknad frå reiarlaget utferde eit såkalla «Letter of Compliance» (LOC) for eit utanlandsk registrert fartøy som ikkje er underlagt tilsyn frå Petroleumstilsynet (SUT-ordninga). Eit slikt dokument vert utferda etter at Sjøfartsdirektoratet med tilhøyrande tilsynsetatar har gjennomført dokumentkontroll og verifikasjon om bord tilsvarande som for ein norskregistrert flyttbar innretning, og funne at fartøyet følgjer dei tekniske og operative krava i Sjøfartsdirektoratet sine forskrifter for norskregistrerte flyttbare innretningar (med unntak av krav som gjeld bemanning og tryggleikstyringssystem).
Avtalane med andre tilsynsetatar som nemnt over, gjeld òg i desse høva.